གཅེས་པའི་ཚེ་སྲོག ། བརྙན།
༄༅། །དེང་རབ་བསླབ་བྱའི་ལེའུ་གསུམ་པ་གཙང་སྦྲ་དགོས་པར་བསྟན་པའི་སྐོར།
ཁོར་ཡུག་གཙང་མ་ཉམས་དགའ་བ། །
ལྷ་མིའི་སྟོན་པ་མཆོག་གིས་བསྔགས། །
སྟོན་པ་ཉིད་ཀྱི་ཕྱག་གིས་ཀྱང་། །
ཕྱགས་མ་བསྣམས་ནས་གད་བདར་མཛད། །
བཤང་གཅི་འདམ་རྫབ་གད་སྙིགས་ཀྱིས། །
ཕྱོགས་ཀུན་ཁེངས་པའི་ཁོར་ཡུག་ལ། །
སྐྱེ་བོ་ཐམས་ཅད་ཞེ་ལོག་སྟེ། །
མ་རབས་རྗེས་ལུས་ཞེས་སུ་སྒྲོག །
བཟའ་བཅའི་ཤུབས་དང་བཏུང་བའི་སྣོད། །
ཁ་ཕྱིས་ལག་ཕྱིས་གཙང་ཤོག་སོགས། །
གད་སྙིགས་སྙིགས་ཟོམ་ནང་དུ་བསྡུ། །
གང་སར་འདོར་བ་སྨད་པའི་གནས། །
གཤང་གཅི་སྣབས་དང་ཁ་ལུད་ནི། །
མདུན་ཐང་འཁོར་ཚིགས་སྤྱི་གླིང་སོགས། །
མི་རྣམས་རྒྱུ་བའི་གནས་དག་ཏུ། །
ཅིས་ཀྱང་མི་འདོར་རབ་ཏུ་འཛེམ། །
མདོར་ན་འཚོ་བའི་གད་སྙིགས་རྣམས། །
བསགས་ཏེ་བསྡུ་བའི་གནས་སུ་སྐྱེལ། །
སྤྱི་པའི་གནས་དང་སྲང་ལམ་དུ། །
ནམ་ཡང་འདོར་བར་མི་བྱ་འོ། །
གྱོན་གོས་སྣུམ་བག་དྲི་ནག་ཅན། །
རྒྱང་ནས་ཚོར་བའི་དྲི་ངན་ཅན། །
དྲུང་ན་གནས་པ་འབྲོ་བྱེད་པ། །
སྐྱེ་བོས་བརྙས་འགྱུར་སྤང་བར་བྱ། །
གོས་གཙང་ལུས་ཀྱི་རྒྱན་དུ་འགྱུར། །
གོས་གཙང་གཞན་ལ་དགའ་བ་སྐྱེད། །
གོས་གཙང་ལྷ་ལ་མཆོད་པར་འགྱུར། །
གོས་གཙང་བགོ་ལ་འབད་པར་བྱ། །
དངོས་པོ་ནག་ནོག་དྲི་ངན་ཅན། །
གད་སྙིགས་ཁྲོད་དུ་འདོར་བ་བཞིན། །
མི་ལུས་ནག་ནོག་དྲི་ངན་ཅན། །
གཞན་གྱིས་གད་སྙིགས་བཞིན་དུ་བལྟ། །
གད་སྙིགས་དྲི་ངན་ལྡན་པ་ལ། །
སུ་ཡང་ཉེ་བར་མི་འདོད་བཞིན། །
མི་ལུས་མི་གཙང་དྲི་ངན་ཅན། །
ཀུན་གྱིས་རྒྱང་དུ་འདོར་བར་བྱེད། །
དྭངས་གཙང་ནང་གི་ཡོན་ཏན་ཚོགས། །
ཡོད་ཀྱང་འཕྲལ་དུ་མཐོང་བ་དཀའ། །
མི་གཙང་ལུས་ཀྱི་དྲི་མའི་ཚོགས། །
བལྟས་པ་ཙམ་གྱིས་མཐོང་བར་འགྱུར། །
དེ་ཕྱིར་མཁས་བླུན་མཐོ་དམན་ཏེ། །
ཀུན་གྱིས་ཕྱི་ཡི་གཙང་སྦྲ་ལ། །
སྣང་མེད་མི་གཞག་མཐོང་ཆེན་བྱ་། །
འཛམ་གླིང་མི་འགྲོ་ལུགསབསླབ། །
ལུས་ཁྲུས་གདོང་ཁྲུས་སོ་ཁྲུས་ཏེ། །
ཁྲུས་ཉགསུམ་ལུས་ཀྱི་རྒྱན་དུ་བཅང་། །
མི་ཐེག་རྡོ་ལྕགས་ཁུར་པོ་ལས།
འདི་ཉིད་རྒྱན་གྱི་དྭངས་མར་མཐོང་། །
ཤེས་མེད་རྒྱན་གྱིས་བརྒྱན་པ་བས། །
ཤེས་ལྡན་གཙང་སྦྲ་ལྷག་པར་མཛེས། །
གཙང་སྦྲས་སྐྱེ་བོའི་ཡིད་དབང་འགུག །
རྡོ་ལྕགས་ཁུར་པོར་ཁྲེལ་དགོད་བྱེད། །
གནས་གཙང་གོས་གཙང་ལུས་གཙང་སྟེ། །
གཙང་མ་གསུམ་ལ་བརྩོན་གྱུར་ན། །
ལུས་ཁམས་བདེ་ཞིང་སེམས་ཁམས་དྭངས། །
ཕ་རོལ་ཡིད་དགའ་ཀུན་གྱིས་བསྟོད། །
དམ་པའི་ཆོས་དང་དེང་རབ་ལུགས། །
ཀུན་གྱིས་བསྔགས་པ་གཙང་སྦྲ་སྟེ། །
དེ་ཉིད་མི་ཤེས་སྐྱེ་བོ་དག །
མི་ཡི་ཁྱུ་རུ་ཚུད་པའང་དཀའ། །
གཙང་སྦྲ་བྱ་བར་བསྟན་པའི་སྐབས་ཏེ་གསུམ་པའོ། །
མཁན་ཆེན་ཚུལ་ཁྲིམས་བློ་གྲོས་ཀྱིས།