པད་འབྱུང་ལགས། ཁྱེད་ཉིད་གང་དུ་བཞུད། རྨེ་སྤྲུལ་ཚང་གིས།
སློབ་དཔོན་པད་འབྱུང་གསོལ་འདེབས།
ཚིག རྨེ་སྤྲུལ་བསྟན་འཛིན་རྒྱ་མཚོ།
གཞས་མ། ལྷ་སྐྱིད།
༡ ༽
ཀྱཻ།ཀྱཻ།ཀྱཻ།
དཔལ་ལྡན་རྫོགས་པའི་སངས་རྒྱས་པདྨ་སྐྱེས། །
སྐྱེ་འཆི་མི་མངའ་ཟག་བྲལ་རྡོ་རྗེའི་སྐུ། །
མ་ཧཱ་གུ་རུ་མཚོ་སྐྱེས་རྡོ་རྗེ་ཉིད།
བུ་སྡུག་གདུང་བའི་དབྱངས་ཀྱིས་དེ་རིང་འབོད། །
༢ ༽
ཉག་ཐག་ཡུས་ཀྱིས་བསྣངས་པའི་སེམས་ཁོང་དུ། །
ཁྱེད་སྐུ་སྲིན་ཡུལ་གཤེགས་ཁའི་སྣང་བརྙན་དེ། །
སྐྱོ་སྣང་ཡད་ཡུད་ཅིག་གི་ངོ་ཁ་ན། །
མདང་སུམ་རྨི་ལམ་བཞིན་དུ་གསལ་སྙམ་བགྱིད། །
༣ ༽
ལྗོང་ཤིང་རྩེ་ནས་བྱ་རྒྱལ་འཕུར་བ་བཞིན། །
བོད་དུ་མི་སྡོད་པད་འབྱུང་སྐྱེད་ཤིག་འདེགས། །
ཡོད་མཆོད་ཐུགས་ནང་གཤིན་ཡང་མི་འདོད་བཞིན། །
འབྲལ་དགོས་འབྱུང་ངོ་ལྷ་སྲས་བཙན་པོ་གསུངས། །
༤ ༽
བསམ་ཡས་ཟུར་མཁར་བར་གྱི་ནེའུ་ཚལ་དུ། །
བོད་ཀྱི་རྗེ་འབངས་རྒན་གཞོན་ཕོ་མོའི་ཚོགས། །
སློབ་དཔོན་བཞུད་པའི་བཤོལ་འདེབས་ལ་འོངས་སྐབས། །
མི་རེའི་ཁོང་ནས་སྙིང་རེ་བཏོན་སྙམ་བྱེད། །
༥ ༽
པད་འབྱུང་རྗེ་ཉིད་སྲིན་ཡུལ་གཤེགས་ཙ་ན། །
བོད་ཁམས་ལྷ་མིའི་སྐྱབས་གནས་སུ་ཡིས་བྱེད། །
མངའ་བདག་རྒྱལ་པོའི་བླ་མཆོད་སུ་ཡིས་བྱེད། །
སློབ་བུའི་མོས་གུས་སེམས་རྟེན་སུས་བྱེད་ཅེས། །
༦ ༽
གདུང་བའི་མཆི་མ་འདོན་བཞིན་སྨྲེ་སྔགས་ཀྱིས། །
བཤོལ་མ་བཏབ་ཀྱང་འཛམ་གླིང་སྐྱོབ་པའི་ཕྱིར། །
སྲིན་པོ་འདུལ་བར་མ་ཕེབས་ཐབས་མེད་པའི། །
བཟློག་མེད་ལས་བསྐོས་བཙན་པོ་སུ་ཡིས་འགོག །
༧ ༽
སྤྲིན་གྱི་གསེབ་ནས་ཅང་ཤེས་བ་ལ་ཧ། །
རྣ་མཆོག་ཀྲོང་ངེ་ཕུར་སྒྲ་སྒྲོགས་པ་ལ། །
ཉེ་བར་བཅིབས་ཏེ་ལྷ་དང་ལྷ་མོ་དང་། །
དཔའ་བོ་སྡེ་བཞིས་ཆིབས་ཀྱི་སྣ་དྲངས་ཚེ། །
༨ ༽
བརྩེ་བའི་ཉམས་ཀྱིས་ཞལ་རས་ཕྱིར་ཕྱོགས་ཏེ། །
ཁོ་བོ་པདྨ་འོད་དུ་ཕེབས་པ་ལ། །
སྐྱེལ་ཐུང་མི་འཚལ་རང་ཡུལ་ལོག་ནས་བྱོན། །
ང་དང་ནམ་ཡང་འབྲལ་བ་མེད་ཅེས་གསུངས། །
༩ ༽
ཐ་མའི་གསུང་གིས་སེམས་གསོའི་ཞལ་ཏ་གནང་། །
འཇའ་འོད་ཀློང་ནས་མཁའ་ལ་དལ་གྱིས་གཤེགས། །
རྗེ་འབངས་ཉ་མོ་བྱེ་ཚན་ལྷུང་བ་ལྟར། །
མྱ་ངན་གདུང་བ་དྲག་པོས་རབ་ཏུ་གཟིར། །
༡༠༽
དད་གུས་ཅན་གྱི་བུ་སློབ་ཤུལ་བཞག་ནས། །
སངས་རྒྱས་གཉིས་པ་པད་འབྱུང་གང་དུ་བཞུད། །
འཛམ་གླིང་རྒྱལ་པོའི་བླ་མཆོད་མི་མཛད་པར། །
བོད་འབངས་སྟོང་པར་བཞག་པ་ཅང་བདེན་ནམ།།
༡༡ ༽
བརྟུལ་ཞུགས་གྲུབ་པའི་ཧེ་རུ་ཀ་དཔལ་ཁྱོད། །
ལང་ཀའི་ཡུལ་གྱི་མཁའ་འགྲོ་འབུམ་ཕྲག་གི །
བསོད་ནམས་སྐལ་བར་ཐོབ་ཀྱང་གདོང་དམར་འགྲོ། །
མགོན་དང་བྲལ་བའི་ལས་སྣང་སེམས་ལ་གཟན། །
༡༢ ༽
འཕོ་ཆེན་ཡེ་ཤེས་རྡོ་རྗེ་གཉུག་མའི་སྲོག །
མི་ཤིགས་འོད་གསལ་དྭངས་མའི་ཐིག་ལེ་རུ། །
ཆགས་པའི་འཆི་མེད་ལང་ཚོར་གཤེགས་བཞུད་དང་། །
འདུ་འབྲལ་སྤྲོས་པའི་མཚན་མས་དབེན་མོད་ཀྱང་། །
༡༣༽
ཨ་འཐས་ཞེན་པས་བཅིངས་པའི་སྐྱེ་བོའི་ངོར། །
གཤེགས་བཞུད་འདུ་འབྲལ་བདེན་པར་གྲུབ་པའི་ཕྱིར། །
རྗེ་འབངས་སྟོན་འཁོར་མཉམ་དུ་འཛོམས་སྐབས་ཀྱི། །
སྔ་ཚུལ་ལོ་རྒྱུས་བསམས་ན་སྣང་བ་སྐྱོ། །
༡༤ ༽
ཟླ་བ་བྱུང་ངོ་ཅོག་གི་ཚེས་བཅུ་དང་། །
ཁྱད་པར་སྤྲེལ་ལོ་སྤྲེལ་ཟླའི་ཚེས་བཅུ་ལ། །
བོད་དུ་དངོས་སུ་འབྱོན་པར་དབུ་སྙུང་བཞེས། །
བསམ་ཞིང་བསམ་ཞིང་ཨོ་རྒྱན་བླ་མ་དྲན། །
༡༥ ༽
ཆོས་ཁྲིམས་དར་གྱི་མདུད་པ་ལྷོད་ཀྱིས་ཞིག །
རྒྱལ་ཁྲིམས་གསེར་གྱི་གཉའ་ཤིང་དུམ་བུར་འཐོར། །
སྙིགས་སྤྱོད་སྣ་དགུས་རྒྱལ་ཁམས་གང་དུས་འདིར། །
བསམ་ཞིང་བསམ་ཞིང་ཨོ་རྒྱན་བླ་མ་དྲན། །
༡༦ ༽
རྒྱལ་བསྟན་སྣང་བའི་ཉི་མ་ནུབ་ལ་གཟིགས། །
བསྟན་འཛིན་པདྨོའི་འདབ་བརྒྱ་མུན་པས་ཟུམ། །
ལྟ་ལོག་འབྱུང་བྱའི་གད་མོ་དགོད་དུས་འདིར། །
བསམ་ཞིང་བསམ་ཞིང་ཨོ་རྒྱན་བླ་མ་དྲན། །
༡༧ ༽
མུ་མེད་མཁྱེན་བརྩེ་ནུས་པའི་ཡེ་ཤེས་བྱིན། །
གང་གི་གསང་གསུམ་ཐིག་ལེར་རོ་གཅིག་ཕྱིར། །
མཁའ་མཉམ་རྒྱལ་བ་རྒྱ་མཚོའི་སྤྱི་གཟུགས་སུ། །
ངེས་པ་རྙེད་པའི་བློ་ཡིས་གསོལ་བ་འདེབས། །
༡༨ ༽
སྐུ་གསུམ་རྒྱལ་བའི་ཕོ་བྲང་པདྨ་འོད། །
གནས་གསུམ་མཁའ་འགྲོའི་སྤྲིན་གྱི་ཚོགས་དབུས་ནས། །
བརྩེ་བའི་ཕྱི་མིག་ཆོས་ལྡན་གངས་ཅན་པར། །
རྣམ་ཀུན་གཟིགས་པའི་ཞལ་བཞེས་མ་བསྙེལ་ཅིག །
༡༩༽
ལྗོངས་འདིའི་ཕན་དང་བདེ་བའི་པདྨོའི་ཚལ། །
ཁྱོད་བྱིན་ཉི་མའི་སྣང་བར་རག་ལས་ཕྱིར། །
ད་དུང་གང་འདུལ་མཛད་པའི་འོད་སྟོང་གིས། །
རྗེས་སུ་སྐྱོང་བའི་ཐུགས་དམ་སླར་ཡང་བསྐུལ། །
༢༠ ༽
གང་འདུལ་མཚན་(བརྒྱད་དང་འཕྲུལ་མཚན་ཉི་ཤུ་སོགས་)དང་སྐུ་ཡི་བཀོད་པ་དང་། །
སྣང་སྲིད་ཟིལ་གནོན་རྡོ་རྗེའི་བརྟུལ་ཞུགས་ཀྱིས། །
མི་བཟད་སྙིགས་མའི་རྒུད་པ་མཐའ་དག་ཀུན། །
དབྱིངས་སུ་གཞིལ་བའི་འཕྲིན་ལས་དུས་ལ་བབ། །
༢༡ ༽
དེ་ལྟར་ལྔ་བདོའི་འགྲོ་བ་བརྩེ་ཆེན་གྱིས། །
མི་འདོར་གྲུབ་པའི་སློབ་དཔོན་དྲིན་པོ་ཆེ། །
རྗེས་སུ་དྲན་པས་མ་བཟོད་སྙིང་ཁོང་ནས། །
རྩེ་གཅིག་གདུང་བས་གསོལ་བ་བཏབ་པ་ལགས། །
༢༢ ༽
སྐྱེ་ཞིང་སྐྱེ་བར་མགོན་དེའི་གསང་གསུམ་གྱི། །
བྱིན་རླབས་འདུད་རྩི་སྙིང་ལ་ཉེར་སིམ་སྟེ། །
རིགས་བདག་བླ་མ་མཆོག་དང་དབྱེར་མེད་པར། །
མཁན་ཁྱབ་འགྲོ་བ་འདྲེན་པའི་མཐུ་ཐོབ་ཤོག །
སྐྱབས་རྗེ་མཁན་ཆེན་པདྨ་དབང་རྒྱལ་ཀྱིས་ཞལ་གསུང་འཕོ་བ།
གཏེར་སྲས་རྡོ་རྗེ་དགྲ་འདུལ་གྱི་ཟབ་གཏེར་གུ་རུའི་བཀའ་བསྡུས།
མཁན་ཆེན་༧ངག་དབང་དཔལ་བཟང་གིས་རྣམ་ཐར་སྒྲ་ཆ་ཚང་།
ལྔ་བའི་བ་བཞིས་ལོ་རྒྱུས། ཨ་སྐྱབས་རྒྱལ་སྲས་ཚང་གིས་གསུང་།
༄༅།།ཆོས་རྗེ་བླ་མའི་སྐྱེ་ཕྲེང་གསོལ་འདེབས། མཁན་གང་བསམ་ལྷུན་འགྲུབ།
སྙིགས་མའི་དུས་གསོལ་འདེབས་འདི་ལས་མི་ཟློག་པ་རྐྱེན་ངན་གང་ཡང་མེད།
དཔལ་སྤྲུལ་ནམ་མཁའ་འཇིགས་མེད་ཀྱི་ཟབ་གཏེར། ཡེ་ཤེས་ཐིག་ལེ་བཞི་བ།
ཨོ་རྒྱན་གསོལ་འདེབས་ཐུགས་དམ་གནད་བསྐུལ་འཇིགས་པ་ཀུན་སྐྱོབ་བཞུགས་སོ༔
རྫ་རྒྱལ་མཁན་ཆེན་འབུམ་པ་རིན་པོ་ཆེས་བཀའ་སློབས།
བླ་མ་རྒྱང་འབོད་མགུར། ༧ཆོས་རྗེ་དམ་པ་ཡིད་བཞིན་ནོར་བུས་མཛད།
རྫ་༧མཚམས་སྤྲུལ་རིན་པོ་ཆེས་ཞལ་གསུངས་བྱིན་ཅན།
ཟབ་གཏེར་བསྟན་རྒྱས་སྨོན་ལམ་བཞུགས་སོ༔ ཞལ་འདོན་པ་པདྨ་རིག་འཛིན།
མཆོག་སྤྲུལ་ལུང་རྟོགས་རིན་པོ་ཆེས་ཞལ་གསུངས་གནང་བའི་གཡང་འགུཊ་སོགས།
ཕ་བུའི་བརྩེ་དུང་གི་གཏམ་རྒྱུད།རྩོམ་པ་པོ་དང་གྱེར་མཁན།ཚེ་རིང་སྐྱིད།
གཅོད་ཡུལ་མཁའ་འགྲོའི་གད་རྒྱངས་རྒྱས་ཁྲིད་སྒྲ་ཆ་ཚང་།
གེ་སར་གསོལ་མཆོད་གསོལ་ལོ་རིང་མོ་བཞུགས།
དཀོན་མཆོག་རྗེས་སུ་དྲན་པའི་མདོ།
བློ་སྦྱོང་ཚིག་རྐང་བརྒྱད་མ་སྒྲ་ཆ་ཚང་། མཁན་ཚུལ་ཁྲིམས་བློ་གྲོས།
བདེ་སྨོན་ཆོས་ཁྲིད་པདྨ་རཱ་གའི་ཕྲ་ཚོམ་འཆད་འཁྲིད་སྒྲ་ཆ་ཚང་།
ཡུལ་མི་རྣམས་ལ་གཏམ་དུ་བྱ་བ་སྒྲ་ཆ་ཚང་།
བུ་ཕྲུག་ཚོས་ཕ་མ་ལ་དྲིན་ལོག་མ་བྱེད་རོགས།
སློབ་དཔོན་པདྨ་འབྱུང་གནས་གྱི་རྣམ་ཐར་བཀའ་བསྡུས་ཕྱོགས་སྒྲིག
གཙུག་ལག་ཁང་དུ་ལྷམ་གྱོན་པའི་རྣམ་སྨིན། འདི་ལ་གཟབ་མོ་ཉོན།
རྫ་རྒྱལ་སྒྲ་མཛོད་འཕྲིན་སྟེགས་སུ་ཕེབས་པར་དགའ་བསུ་ཞུ།